కరుణానిధి పేరిట ఆస్తులు లేవు

కరుణానిధి మరణంతో తమిళనాడు మొత్తం శోకసంద్రంలో మునిగిపోయింది. సంతాప సూచికగా.. రాష్ట్రమంతా స్వచ్ఛందంగా బంద్ పాటిస్తున్నారు. తమిళనాడులో వారం రోజులపాటు సంతాప దినాలు పాటించనున్నారు. కరుణ మరణం తీర్చని లోటని ప్రధాని అభివర్ణించగా.. తన జీవితంలో ఇదే చీకటి రోజంటూ సూపర్ స్టార్ రజనీకాంత్ ఉద్వేగానికి లోనయ్యారు. దశబ్దాలపాటు తమిళ రాజకీయాల్లో కరుణానిధి కీలక పాత్ర పోషించారు. స్టాలిన్, అళగిరి, కనిమొళి… ఇలా ఆయన కుటుంబం మొత్తం రాజకీయాల్లో ఉంది. యూపీఏ హయాంలో 2జీ స్కాం వెలుగులోకి రావడంతో కనిమొళి జైలుకెళ్లారు. దీంతో అవినీతి మరక కరుణ కుటుంబానికి అంటుకుంది. కానీ విచిత్రం ఏంటంటే.. కరుణ పేరిట ఎలాంటి ఆస్తులు లేవు. 13 సార్లు ఎమ్మెల్యేగా, ఐదుసార్లు తమిళనాడు సీఎంగా పని చేసిన కరుణానిధి పేరిట కారు, ఇల్లు, పొలం, ఇంటి స్థలం.. ఇలా ఎలాంటి ఆస్తులు లేకపోవడం ఆశ్చర్యకరం. 2016లో తిరువారూర్ నుంచి ఎమ్మెల్యేగా పోటీ చేసిన ఆయన ఎన్నికల సంఘానికి సమర్పించిన అఫిడవిట్ ప్రకారం ఆయనకు సొంత ఇల్లు కూడా లేదు. ఆయన అప్పటికి నివాసం ఉంటున్న ఇంటిని అంజుగం ట్రస్ట్‌కి విరాళంగా ఇచ్చినట్టు పేర్కొన్నారు. తన మరణం తర్వాత ఆ స్థలంలో హాస్పిటల్ నిర్మించాలని ఆయన కోరుకున్నారు. తన పేరిట ఎలాంటి స్థిరాస్తులు లేవు, కానీ బ్యాంకు డిపాజిట్లు, నగదు రూపంలో రూ.13.42 కోట్ల విలువైన చరాస్థులు ఉన్నాయని కరుణ అఫిడవిట్‌లో పేర్కొన్నారు. ఆయన మొదటి భార్య దయాళు అమ్మాల్ పేరిట రూ.15 కోట్ల విలువైన ఆస్తులు, రెండో భార్య రజతి అమ్మాల్ పేరిట రూ.42 కోట్లు విలువైన ఆస్తులున్నాయి. తన వార్షిక ఆదాయం రూ.1.21 కోట్లని 2014-15లో అఫిడ‌విట్‌లో కరుణానిధి పేర్కొన్నారు. అదే ఏడాది రజతి అమ్మాల్ వార్షిక ఆదాయం రూ.1.16 కోట్లు కాగా, దయాళ్ అమ్మాల్ సంపాదన రూ.9.21 లక్షలు.
2011 నాటి అఫిడవిట్ ప్రకారం కరుణ ఆస్తుల విలువ రూ.4.93 కోట్లు. తన మొదటి భార్య పేరిట రూ.15.34 కోట్లు, రెండో భార్య పేరిట రూ.20.83 కోట్ల విలువైన చరాస్తులు ఉన్నాయని ఆయన పేర్కొన్నారు

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com