ఆలయాల్లో పరిశుభ్రత కోసం కమిటీ

దేశవ్యాప్తంగా ఉన్న ఆలయాలు, మసీదులు, చర్చిల్లో న్యాయపరమైన పరిశీలనకు సర్వోన్నత న్యాయస్థానం నడుంబిగించింది. ప్రార్థనా మందిరాలు, స్వచ్ఛంద సంస్థల్లో పరిశుభ్రత, ఆస్తులు, ఖాతాల తనిఖీలను అన్ని జిల్లాల న్యాయమూర్తులు పరిశీలించి సంబంధిత రాష్ట్రాల్లోని హైకోర్టులకు నివేదిక సమర్పించాలని స్పష్టం చేసింది. ఈ నివేదికలు ఆధారంగా వాటికి సంబంధించి హైకోర్టులు చట్టపరమైన ఆదేశాలు జారీచేస్తాయని సూచించింది. మతాలకు అతీతంగా అన్ని ప్రార్థనా మందిరాల్లో సందర్శకులు ఎదుర్కొంటున్న ఇబ్బందులు, నిర్వహణ లోపాలు, పరిశుభ్రత, దేవాలయాలకు సంబంధించిన ఆస్తుల పరి రక్షణ బాధ్యత కేవలం రాష్ట్ర ప్రభుత్వాలకే కాకుండా కేంద్రంతోపాటు న్యాయస్థానాలకు ఉంటాయని జస్టిస్ట్ ఆదర్శ్ కే గోయల్, జస్టిస్ అబ్దుల్ నజీర్‌ల ధర్మాసనం గత నెలలో ఈ ఆదేశాలు జారీచేసింది.దేశంలోని 20 లక్షలకు పైగా ప్రధాన ఆలయాలు, మూడు లక్షల మసీదులు, వేలాది చర్చ్‌ల్లో నిర్వహణ, పరిశుభ్రత అంశాలను సుప్రీంకోర్టు సుమోటాగా స్వీకరించింది. అయితే, జిల్లా కోర్టులు, హైకోర్టులు, సుప్రీంకోర్టులో పెద్ద సంఖ్యలో ఖాళీలు ఏర్పడంతో ఇప్పటికే దేశంలో సుమారు 3 కోట్ల కేసులు పెండింగ్‌లో ఉండగా, ప్రస్తుతం సుప్రీం నిర్ణయంతో న్యాయస్థానాలపై మరింత వత్తిడి పెరుగుతుంది. ఒక్క తమిళనాడులోనే దాదాపు 7,000 పురాతన ఆలయాలు ఉన్నాయని ఈ కేసులో కోర్టు సహాయకుడిగా నియమితులైన గోపాల్ సుబ్రమణియం తెలిపారు. చాలా వరకు ప్రార్థనా మందిరాల్లో ముఖ్యంగా చిన్న చిన్న వాటిలో నిర్దిష్టమైన నియామాలు అనుసరించకపోవడం సవాల్‌గా మారింది. జిల్లా న్యాయమూర్తులు స్థానిక ఆధికారులతో కలిసి ప్రార్థనా మందిరాలపై వస్తున్న ఫిర్యాదులను పరిశీలించాలని సుప్రీంకోర్టు వ్యాఖ్యానించింది. పూరీ జగన్నాథ్ ఆలయంలోకి కేవలం హిందువులను మాత్రమే అనుమతించడంపై మృణాళిని పధి అనే వ్యక్తి దాఖలు చేసిన ప్రజా ప్రయోజన వ్యాజ్యంపై విచారణ సందర్భంగా ధర్మాసనం ఈ ఆదేశాలు వెలువరించింది. దీన్ని దేశవ్యాప్తంగా ఉన్న అన్ని ప్రార్థనా మందిరాలు, స్వచ్ఛంద సంస్థలకు అన్వయిస్తూ ఉత్తర్వులు జారీ చేసింది. మందిరాల్లో పరిశుభ్రత, నిర్వహణ, ఆస్తుల విషయమై ఎవరైనా భక్తులు జిల్లా జడ్జ్‌కు ఫిర్యాదు చేయవచ్చని, దీనిపై సదరు న్యాయమూర్తి తన పరిధిలోని ఉన్న కింది కోర్టులకు వాస్తవాలను పరిశీలించాలని ఆదేశించవచ్చని తెలిపింది. దిగువ కోర్టు సమర్పించిన నివేదికను ఆవసరమైతే హైకోర్టుకు అందజేయాలని సూచించింది. చట్ట ప్రకారం ప్రజా ప్రయోజనాల కోసం ఈ అంశాలను హైకోర్టు పరిగణనలోకి తీసుకుని, వ్యక్తిగత వాస్తవిక పరిస్థితులకు అనుగుణంగా న్యాయపరమైన చర్యలు తీసుకుంటుందని, ఇందులో ఎలాంటి సందేహం లేదని తెలిపింది. ఈ కేసు తదుపరి విచారణను సెప్టెంబరు 5 కు వాయిదా వేసింది. అలాగే పూరీ జగన్నాథ్ ఆలయంలోకి కేవలం హిందువులనే అనుమతించడాన్ని అభ్యంతరం వ్యక్తం చేసింది. సంప్రదాయ వస్త్రధారణ, ఇతర మతస్థుల నుంచి డిక్లరేషన్ లాంటి నిబంధనలను పాలక మండలి అమలు చేసి, కులమతాలకు అతీతంగా దర్శించుకోడానికి భక్తులకు అనుమతి ఇవ్వాలని పేర్కొంది. హిందూమతం ఏ ఇతర మతాల విశ్వాసాన్ని వ్యతిరేకించదు సరికదా, శతాబ్దాల నుంచి శాశ్వత విశ్వాసం, విజ్ఞానానికి ప్రేరణగా నిలుస్తుందని న్యాయమూర్తులు వ్యాఖ్యానించారు.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com