స్వైన్ సైరన్

0

రాష్ట్ర ప్రజలను చలి కంటే ఎక్కువగా స్వైన్‌ ఫ్లూ భూతం వణికిస్తోంది. ఈ ప్రాణాంతక వైరస్ బారిన పడి ఇప్పటివరకూ 15 మంది మరణించారు. హైదరాబాద్, రంగారెడ్డి జిల్లాల పరిధిలో సుమారు 400 మంది హెచ్‌1ఎన్‌1 వైరస్‌ బారినపడ్డారు. ఒక్క అక్టోబరు నెలలోనే 355 కేసులు నమోదవడం గమనార్హం. కొద్ది రోజులుగా వాతావరణంలో చోటుచేసుకుంటున్న అనూహ్యమైన మార్పులతో హెచ్‌1ఎన్‌1 వైరస్‌ విజృంభిస్తోంది. దీంతో ప్రజలు ఆందోళన చెందుతున్నారు. చల్లని వాతావరణంలో హెచ్1ఎన్1 వైరస్‌ ఎక్కువ కాలం జీవిస్తుంది. దీంతో ఇది మరింత ప్రమాదకరంగా పరిణమిస్తోంది. జనవరి నుంచి ఆగస్టు వరకు చాప కింద నీరులా ఉన్న ఈ వైరస్‌ శీతాకాలం మొదలవగానే పంజా విసురుతోంది. సెప్టెంబర్‌లో ఉద్ధృతమై అక్టోబర్‌లో తీవ్రస్థాయికి చేరింది. స్వైన్ ఫ్లూ బారినపడిరెండు నెలల్లో 15 మంది మరణించారు. ఈ ఏడాదిలో ఇప్పటి వరకూ మొత్తం 16 మంది ఈ ప్రాణాంతక వైరస్ కారణంగా మృతి చెందారు. స్వైన్ ఫ్లూ కేసులు అంతకంతకూ పెరుగుతుండటంతో పాటు.. మృత్యువాత పడుతున్నవారి సంఖ్య కూడా ఒక్కసారిగా పెరగడంతో ప్రజలు ఆందోళన చెందుతున్నారు. గాంధీ, ఉస్మానియా, ఫీవర్‌ ఆసుపత్రులతో పాటు వరంగల్‌ ఎంజీఎం, తదితర జిల్లా ప్రభుత్వాసుపత్రుల్లో ప్రత్యేక స్వైన్‌ ఫ్లూ వార్డులను ప్రభుత్వం ఏర్పాటు చేసింది. పలు ప్రైవేట్, కార్పొరేట్‌ ఆసుపత్రుల్లోనూ స్వైన్‌ ఫ్లూ బాధితులు చికిత్స పొందుతున్నారు. రాజధాని హైదరాబాద్‌, పరిసర జిల్లాల్లోనే స్వైన్‌ ఫ్లూ కేసుల నమోదు ఎక్కువగా ఉంది. మొత్తం కేసుల్లో అత్యధికంగా 158 కేసులు హైదరాబాద్‌లోనే నమోదయ్యాయి. రంగారెడ్డి (69), మేడ్చల్‌ (50) జిల్లాల్లోనూ స్వైన్‌ ఫ్లూ అధికంగానే ఉన్నట్లు తెలుస్తోంది. స్వైన్ ఫ్లూతో పాటు డెంగ్యూ, చికెన్ గున్యా తదితర వైరల్ ఫీవర్లు కూడా రాష్ట్రాన్ని వణికిస్తున్నాయి. ఆస్పత్రులన్నీ రోగులతో నిండిపోతున్నాయి. అధికారుల చర్యలు ఏమాత్రం ప్రభావం చూపలేకపోతున్నాయి. డెంగ్యూ మహమ్మారితోనూ పలువురు మృతి చెందడం ఆందోళన కలిగిస్తోంది.

Share.

About Author

Leave A Reply