ఆషాఢ మాసం తర్వాత కర్ణాటకలో కిరికిరి

ర్ణాటకలో జేడీఎస్- కాంగ్రెస్ సంకీర్ణ ప్రభుత్వానికి అసమ్మతి ముప్పు పొంచి ఉన్నట్టు ప్రచారం సాగుతోంది. ఆగస్టు 11 తో ఆషాడ మాసం ముగియనుండగా మంత్రివర్గ విస్తరణ చేపట్టాలని కుమారస్వామి భావిస్తున్నారు. అయితే ఇదే సమయంలో ప్రభుత్వం కూలిపోతుందంటూ రాజకీయ వర్గాలు చెవులు కొరుక్కుంటున్నాయి. కనీసం 8 నుంచి 10 మంది కాంగ్రెస్ ఎమ్మెల్యేలు బీజేపీతో చేతులు కలిపి ప్రభుత్వాన్ని పడగొట్టే ప్రయత్నం చేస్తున్నట్టు సమాచారం. తమ పదవులకు రాజీనామా చేస్తే సభలో మెజార్టీ 112 నుంచి 104కు పడిపోతుంది.. దీంతో బీజేపీ సులువుగా ప్రభుత్వాన్ని ఏర్పాటుచేస్తుందని వ్యూహాత్మకంగా వ్యవహరిస్తున్నారని అంటున్నారు. అయితే ఈ ఊహాగానాలను కాంగ్రెస్ వర్గాలు తోసిపుచ్చుతున్నాయి. త్వరలో క్యాబినెట్‌ను విస్తరించనుండటంతో అధిష్ఠానంపై ఒత్తిడి తేవడానికి ఇలాంటి ప్రచారం చేస్తున్నారని, ఇలాంటి ట్రిక్స్‌కు తాము లొంగబోమని కాంగ్రెస్‌కు చెందిన ఓ సీనియర్ నేత వ్యాఖ్యానించారు. మరోవైపు కర్ణాటక బీజేపీ అధ్యక్షుడు, మాజీ ముఖ్యమంత్రి బీఎస్ యడ్యూరప్ప అమిత్ షా, జాతీయ కార్యదర్శి రామ్‌లాల్‌తో ఢిల్లీలో కలిశారు. జేడీఎస్- కాంగ్రెస్ సంకీర్ణ ప్రభుత్వాన్ని గద్దె దింపడానికి వారి అభిప్రాయాన్ని తీసుకోవడానికే ఆయన ఢిల్లీ వెళ్లారని రూమర్లు కూడా వినిపిస్తున్నారు. అయితే, దీనికి కొంత సమయం తీసుకోవాలని వారు సూచించినట్టు బీజేపీ వర్గాలు వ్యాఖ్యానించాయి. కానీ, అధికారికంగా మాత్రం 2019 సాధారణ ఎన్నికల్లో అనుసరించాల్సిన వ్యూహాంపై మాట్లడటానికే యడ్యూరప్ప అధిష్ఠానాన్ని కలిసినట్టు చెబుతున్నారు. మరోవైపు తమ ఎమ్మెల్యేలకు డబ్బు, పదవులను ఎరగా వేసి ప్రభుత్వాన్ని కూలదోయడానికి బీజేపీ ప్రయత్నిస్తోందని కర్ణాటక పీసీసీ అధ్యక్షుడు దినేశ్ గుండూరావ్ ఆరోపించారు. కానీ తమ ప్రభుత్వాన్ని కూల్చడానికి బీజేపీ చేసే ప్రయత్నాలు ఫలించవని మండిపడ్డారు. కర్ణాటక మున్సిపల్ శాఖ మంత్రి రమేశ్ జార్కిహోలి మరో ఆరుగురు ఎమ్మెల్యేలతో కలిసి సోమవారం ఢిల్లీకి వెళ్లారు. యడ్యూరప్ప కూడా ఇదే రోజున వారితోపాటు ఒకే విమానంలో ప్రయాణించారు. దీంతో ఈ ప్రచారానికి మరింత బలం చేకూరింది. ఈ ప్రచారాన్ని కేపీసీసీ అధ్యక్షుడు కొట్టిపారేశారు. కాంగ్రెస్ సీనియర్ నేతలను కలవడానికే మంత్రి రమేశ్, ఇతర ఎమ్మెల్యేలు ఢిల్లీకి వెళ్లారని స్పష్టం చేశారు. మంత్రి రమేశ్ కూడా దీనిపై స్పందిస్తూ.. అధిష్ఠానాన్ని కలవడానికి ఢిల్లీ వెళితే తాను పార్టీని వీడుతానని ప్రచారం చేస్తున్నారని మండిపడ్డారు. అంతేకాదు బీజేపీకి చెందిన 10 మంది ఎమ్మెల్యేలు కాంగ్రెస్‌లో చేరడానికి సిద్ధంగా ఉంటే, తానెందుకు అక్కడకు వెళతానని ఎదురుదాడి చేశారు. బీజేపీ వర్గాలు మాత్రం 8 నుంచి 10 మంది కాంగ్రెస్ ఎమ్మెల్యేలు తమ నేతలతో టచ్‌లో ఉన్నారని, వారు రాజీనామాలకు కూడా వెనుకాడరని అంటున్నాయి.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com