ఏపీ రోడ్లు మీ తాత సొత్తా?: పవన్ కళ్యాణ్

జనసేన అధినేత పవన్ కళ్యాణ్ చేపట్టిన ‘ప్రజా పోరాట యాత్ర’ 8వ రోజుకు చేరుకుంది. మంగళవారం నాడు శ్రీకాకుళం జిల్లా టౌన్‌లో చేపట్టిన నిరసన కవాతులో పాల్గొన్న పవన్ కళ్యాణ్ ప్రసంగిస్తూ.. ప్రభుత్వంపై నిప్పులు కురిపించారు. స్పెషల్ కేటగిరీ స్టేటస్ మీద మూడన్నర సంవత్సరాల్లో 36 సార్లు మాట మార్చింది టీడీపీ. మోసం చేసింది టీడీపీ. పవన్ కళ్యాణ్ అప్పుడు ఇప్పుడు ఒకే మాట మీద ఉన్నాడంటూ ఆవేశంగా ప్రసంగించారు పవన్ కళ్యాణ్.

‘నేను శ్రీకాకుళం జిల్లాకు వచ్చి 10 రోజులు అయ్యింది. శ్రీకాకుళం చదువులు నేల.. నేను విశాఖపట్నంలో నటనలో ఓనమాలు నేర్చుకుంటున్న సందర్భంలో శ్రీకాకుళం జిల్లాతో ప్రత్యేక అనుబంధం ఉంది. ఇక్కడే తిరిగే వాడిని. 19 జీవనదులు ప్రవహిస్తున్న నేల మన శ్రీకాకుళం. ఇలాంటి నేల నుండి ఉపాధిలేక వలసలు వెళ్లిపోవడం దారుణం. ఆంధ్రప్రదేశ్ మొత్తం మీద మహిళలు ఎక్కువగా ఉన్న నేల ఇది. ఇలాంటి నేల మీద వీరగున్నమ్మలే పుడతారు. ఎందరో మహానుభావులు పుట్టిన ఈ నేల వెనకబడింది. ఇది వెనకబడటం కాదు.. వెనక్కినెట్టబడటం.. నిర్లక్ష్యానికి గురికాబడటం.

శ్రీకాకుళం జిల్లాకు టీడీపీ, వైసీపీ ఎంత చేస్తుందో నాకు తెలియదు కాని.. ఈ శ్రీకాకుళం జిల్లాకు జనసేన అండగా ఉంది.. పవన్ కళ్యాణ్ అండగా ఉంటాడు. శ్రీకాకుళం జిల్లాలో ఉద్దానం కిడ్నీ సమస్య వల్ల ప్రజలు చనిపోతున్నారు. చిన్న చిన్న పిల్లలు, మహిళలు చనిపోతున్నారు. లక్షల మంది వలసలు పోతున్నారు. కనీస అవసరాలు లేవు. ఇన్ని సమస్యలు ఉన్నా ప్రభుత్వం పట్టనట్టు వ్యవహరిస్తోంది.

వాళ్లకి ఎప్పడూ వాళ్ల సంపాదన, వాళ్ల రాజకీయ గుర్తింపు తప్ప ప్రజా సమస్యలు పట్టడం లేదు. ఈ జిల్లాలో ఏమూలకు వెళ్లినా ప్రభుత్వ నిర్లక్ష్యమే కనిపిస్తుంది. అణువిద్యుత్ కేంద్రాల ఏర్పాటుకు శ్రీకాకుళం జిల్లా కావాలి కాని అభివృద్దికి శ్రీకాకుళం అవసరం లేదా? ఉద్యోగాలకు శ్రీకాకుళం వద్దు.. వలసలను ఆపడానికి శ్రీకాకుళం వద్దు. చైతన్యం ఉన్న ఈ జిల్లా తరపున పోరాడటానికి మీ తరపున ఉన్నాను. ఉద్దానం విషయంలో నేను స్పందిస్తేనే.. ప్రభుత్వంలో చలనం వచ్చింది. ఈ సమస్యపై ప్రభుత్వం ఎంతో కొంత స్పందించింది అంటే మనం ప్రశ్నించడం వల్లే.

ముఖ్యమంత్రి గారు మేం చేయాల్సిందంతా చేశాం అంటూ చేతులు దులుపేసుకుంటున్నారు. ఇక ఆంధ్రప్రదేశ్‌లోని ప్రతి జిల్లాకు రైల్వే స్టేషన్ ఉంది. కాని శ్రీకాకుళం జిల్లాకు రైల్వేస్టేషన్ లేదు. ఇక్కడ నుండి రైల్వే స్టేషన్‌కు పోవాలంటే ఆముదాల వలస పోవాలి. ఇదికాదా వెనుకుబాటుతనం. ఈరోజు మేం ప్రశ్నిస్తుంటే.. జనసేన పార్టీకి ఒక్కశాతం ఓట్లు మాత్రమే వస్తాయి అంటున్నారు చంద్రబాబు నాయుడు. మరి ఈ ఒక్కశాతం ఓట్ల గురించేనా జనసేన ఆఫీస్ కి వచ్చి బ్రతిమిలాడింది. రేవు దాటాక తెప్ప తేలేస్తున్నారు. గతం మర్చిపోకండి చంద్రబాబూ.

అలాగే ముఖ్యమంత్రి గారి అబ్బాయి, ముద్దుల కొడుకు లోకేష్.. మా నాన్న వేసిన రోడ్లు మీదే నడుస్తున్నారంటున్నారు.. ఏం రోడ్లు మీ తాతల సొత్తా? లేదంటే మీ జేబుల్లోంచి డబ్బులు తీసి రోడ్లు వేయిస్తున్నారా? ప్రతిదానికి మేమే చేశాం.. మేమే చేశాం అంటూ గొప్పలు చెప్పుకుంటున్నారు వీళ్ల జేబుల్లో డబ్బులు తీసి ఖర్చు చేసినట్లు ప్రసంగాలు చేస్తున్నారు. ఇది ప్రజల సొత్తు. ప్రజల కష్టం. ప్రజలు టాక్స్ కడితేనే డబ్బులు వస్తున్నాయి. ఈ కథలు ఎవరికి చెప్తున్నారు. ఇలాంటి కథలు పాత తరానికి చెప్పండి.. ఈ తరానికి కాదు.. కత్తులు దూసే యువతారానికి కాదు.

ప్రత్యేక హోదా గురించి గతంలో అదేం సంజీవని కాదు అన్నారు. హోదా గురించి పవన్ కళ్యాణ్‌ను పోరాటం చేస్తుంటే.. బీజేపీ మాట్లాడిస్తుంది అంటున్నారు. అసలు బీజేపీ నాయకుల్ని అమరావతికి పిలుపించుకుని ఏనుగుల మీద ఊరేగించి, సన్మానాలు చేసింది తెలుగు దేశం పార్టీనా? లేక జనసేనా? చెప్పండి ముఖ్యమంత్రి గారూ. స్పెషల్ కేటగిరీ స్టేటస్ మీద మూడన్నర సంవత్సరాల్లో 36 సార్లు మాట మార్చారు. మీరు మోసం చేశారు. పవన్ కళ్యాణ్ అప్పుడు ఇప్పుడు ఒకే మాట మీద ఉన్నాడంటూ ప్రభుత్వానికి చురకలు అంటించారు పవన్ కళ్యాణ్.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com