‘సవ్యసాచి’ సినిమా రివ్యూ

0

మైత్రీ మూవీ మేకర్స్ కేవలం మూడు సినిమాలతో టాలీవుడ్‌లో భారీ నిర్మాణ సంస్థగా అవతరించింది. అలాంటి పెద్ద బ్యానర్ నుంచి అక్కినేని నాగచైతన్య హీరోగా సినిమా వస్తోందనడంతో ప్రేక్షకుల్లో ఆసక్తి పెరిగింది. ‘కార్తికేయ’ లాంటి వైవిధ్య చిత్రాన్ని తెరకెక్కించిన చందు మొండేటి దర్శకుడు అనడంతో ఏదో కొత్తదనం ఉంటుందని అర్థమైపోయింది. ఆ తరవాత సినిమా టైటిల్ ‘సవ్యసాచి’ అని ప్రకటించినప్పుడు అంచనాలు ఏర్పడ్డాయి. ప్రమోషన్లతో అంచనాలను భారీగా పెరిగాయి. నాగచైతన్య ఇమేజ్‌ను కమర్షియల్‌గా ఈ సినిమా పెంచుతుందని ఆయన అభిమానులు భావించారు. మరి దీపావళి కానుకగా నేడు(నవంబర్ 2న) విడుదలైన ఈ చిత్రం వారి అంచనాలను అందుకుందో లేదో చూద్దాం.

కథ
ప్రతీకారం అనే ఎమోషన్‌పై నిర్మించిన థ్రిల్లింగ్ డ్రామా ‘సవ్యసాచి’. అయితే దీనికి ‘వానిషింగ్ ట్విన్ సిండ్రోమ్’ అనే అంశాన్ని చేర్చడం వల్ల కథకు కొత్తదనం వచ్చింది. తల్లి గర్భంలో ఏర్పడిన కవల పిండాలు పోషకాహార లోపం వల్ల ఒకటిగా కలిసిపోవడమే ఈ లోపం. ఇదే లోపంతో విక్రమ్ ఆదిత్య(నాగచైతన్య) పుడతాడు. అయితే విక్రమ్ ఆదిత్య ఒకరు కాదు.. అతనిలో ఆదిత్య రెండో వ్యక్తి. అతను బయటికి కనిపించకపోయినా న్యూరాన్ల రూపంలో విక్రమ్ మెదడు, ఎడమ చేతిలో దాగి ఉంటాడు. అతనికి అన్ని ఫీలింగ్స్ ఉంటాయి. వాటిని విక్రమ్ ఎడమచేతితో చూపిస్తుంటాడు.

మరోవైపు అరుణ్ రాజ్(మాధవన్) ఎంతో మేధావి. కానీ అతన్ని ఎవరైనా విమర్శించినా, తను కావాలనుకున్నదాన్ని ఎవరైనా దూరం చేసినా తట్టుకోలేడు. వారిని చంపడానికి కూడా వెనకాడడు. అలాంటి వ్యక్తి విక్రమ్ ఆదిత్య కుటుంబాన్ని టార్గెట్ చేస్తాడు. వాళ్లని అంతం చేయాలనుకుంటాడు. విక్రమ్ బావని చంపేస్తాడు. విక్రమ్‌తో అతని అక్క(భూమిక), పాపని కూడా చంపేయాలనుకుంటాడు. అసలు అరుణ్‌కు విక్రమ్ కుటుంబాన్ని చంపాల్సిన అవసరమేంటి? అరుణ్‌ను విక్రమ్ ఎలా ఎదుర్కొన్నాడు? తన అక్క, మేనకోడలిని ఎలా కాపాడుకున్నాడు? ఈ థ్రిల్లర్ డ్రామాలో చిత్ర(నిధి అగర్వాల్) పాత్రేమిటి? అనేదే సినిమా.

ఎలా ఉందంటే..
అసలు కాన్సెప్టే చాలా కొత్తగా ఉంది. అవిభక్త కవలలుగా పుట్టాల్సిన ఇద్దరు ఒకరిగా కలిసిపోవడం.. లోపలున్న మరో వ్యక్తి బయటికి కనిపించే వ్యక్తికి తెలియకుండా స్పందించడం.. భలే గమ్మత్తుగా అనిపిస్తుంది. అయితే ఇలాంటి కాన్సెప్ట్‌‌‌ను దర్శకుడు సరిగా వాడుకోలేదని అనిపిస్తుంది. కథనం చాలా సాదాసీదాగా ఉంది. తొలి భాగంలో హీరో పరిచయం, హీరోహీరోయిన్ల మధ్య ప్రేమ, కొన్ని ఆసక్తికర సన్నివేశాలతో బాగానే నడిపించారు. ఇంటర్వల్ చూసిన ప్రేక్షకుడు ఇక సెకండాఫ్‌లో విలన్, హీరోల మధ్య గేమ్ అదిరిపోతుందని భావిస్తాడు. కానీ ఆ క్యూరియాసిటీని కొనసాగించడంలో దర్శకుడు విఫలమయ్యారు.

సెకండాఫ్ బాగాలేదు అని చెప్పలేం. కాకపోతే సంతృప్తికరంగా లేదు. విలన్, హీరో మధ్య మైండ్ గేమ్‌ను దర్శకుడు ఇంకాస్త బలంగా రాసుకుంటే బాగుండేది. స్క్రీన్‌ప్లే ప్రధానమైన ఇలాంటి మైండ్ గేమ్‌లో అదే ప్రధాన లోపంగా కనిపించింది. సీరియస్ సాగే థ్రిల్లర్ గేమ్‌లో ‘శుభద్ర పరిణయం’ నాటకాన్ని చొప్పించడం ప్రేక్షకుడికి బోర్ కొట్టిస్తుంది. వాస్తవానికి ప్రేక్షకుడికి వినోదం పంచడానికి దర్శకుడు ఆ సన్నివేశం పెట్టి ఉండొచ్చు. ఆ నాటకం సన్నివేశాన్ని విడిగా చూస్తే నచ్చుతుంది. కానీ కథలో భాగంగా ప్రేక్షకుడు అంగీకరించలేడు. ఫస్టాఫ్ యావరేజ్‌గా ఉన్నందుకు సెకండాఫ్ ఆసక్తికరంగా ఉండుంటే సినిమా స్థాయి మరోలా ఉండేది.

సినిమాలో ప్రేక్షకుడు బాగా కనెక్ట్ అయ్యేది ‘ఎడమచేతి’ ఎమోషన్‌కి. విక్రమ్ ఆపదలో ఉన్నప్పుడు, ఎక్కువగా ఆనందం పొందుతున్నప్పుడు ఎడమచేయి స్పందించే తీరు ప్రేక్షకుడిని బాగా ఆకట్టుకుంటుంది. ముఖ్యంగా యాక్షన్ సన్నివేశాల్లో ఆ కాన్సెప్ట్ బాగా పండింది. దీనికి తోడు కీరవాణి నేపథ్య సంగీతం సన్నివేశాలను బాగా ఎలివేట్ చేసింది. నాగచైతన్య, నిధి అగర్వాల్ కెమిస్ట్రీ బాగుంది. వీరిద్దరి ప్రేమకథను కొంచెం సాగదీశారేమో అనిపిస్తుంది. న్యూయార్క్‌లో సత్తిబాబు లవంగం(షకలక శంకర్) కామెడీ బాగా పండింది. వచ్చీరానీ ఇంగ్లిష్‌లో శంకర్ బాగా నవ్వించాడు. ఇక సినిమాలో చెప్పుకోవాల్సిన మరో విషయం డైలాగులు. చందు మొండేటి చాలా బాగా రాశారు.

ఎవరెలా చేశారంటే..
సినిమాలో రెండు పాత్రలు కీలకం. ఒకటి విక్రమ్.. మరొకటి అరుణ్. విక్రమ్ పాత్రకు నాగచైతన్య పూర్తి న్యాయం చేశాడు. ఎప్పటిలానే మంచి ఎనర్జీతో చైతూ నటించాడు. ఫైట్లు ఇరగదీశాడు. డ్యాన్స్ కూడా బాగా చేశాడు. ముఖ్యంగా ‘నిన్ను రోడ్డు మీద’ పాటలో చైతూ డ్యాన్స్ బాగుంది. ఇక అరుణ్ పాత్రలో మాధవన్ తన క్రూరత్వాన్ని చూపించారు. తెలుగులో తొలిసారి నటించిన ఈ మాజీ లవర్ బాయ్.. విలన్ పాత్రలో మెప్పించే ప్రయత్నం చేశారు. ఆయన పాత్ర మరీ గొప్పగా ఉందని చెప్పలేం కానీ.. ఉన్నంతలో బాగానే చేశారు. ఇక ఈ సినిమాతో తెలుగు ప్రేక్షకులకు పరిచయమైన నిధి అగర్వాల్.. చిత్ర పాత్రలో ఇమిడిపోయింది. ఆమె నటనలో ఎలాంటి ఇబ్బంది కనిపించలేదు. డ్యాన్సులు కూడా చాలా బాగా చేసింది. భూమిక, వెన్నెల కిషోర్, సత్య, విద్యుల్లేఖ రామన్, రావు రమేశ్, తాగుబోతు రమేశ్, షకలక శంకర్, భరత్ రెడ్డి తమ పాత్రల పరిధి మేర నటించారు.

సాంకేతిక విభాగం..
టెక్నికల్ టీమ్‌లో ముఖ్యంగా చెప్పుకోవాల్సింది సంగీత దర్శకుడు కీరవాణి గురించి. భావోద్వేగ సన్నివేశాల్లో ప్రేక్షకుడు కంటతడి పెట్టాడంటే దానికి కారణం కీరవాణి నేపథ్య సంగీతం. అంత గొప్పగా ఇచ్చారాయన. పాటలు కూడా బాగున్నాయి. ఇక జె.యువరాజ్ సినిమాటోగ్రఫీ సినిమాకు ప్లస్. హీరో హీరోయిన్లను చాలా అందంగా చూపించారు. అలాగే యాక్షన్ సన్నివేశాల చిత్రీకరణ కూడా బాగుంది. మైత్రీ మూవీ మేకర్స్ నిర్మాణ విలువల గురించి కొత్తగా చెప్పాల్సిన అవసరం లేదు.

చివరిగా..
ఇదో వైవిధ్యమైన చిత్రం. ‘మేధావి తన తెలివిని మంచి కోసం వాడాలి కానీ, వినాశనం కోసం కాదు.. అలాంటి మేధావితనం అతన్నే నాశనం చేస్తుంది’ అనేది చిత్ర సారాంశం. వినోదం, భావోద్వేగం, యాక్షన్ ఇలా అన్ని అంశాలు ఉన్నాయి. దీనికి మంచి కథనం తోడై ఉంటే ఇంకా బాగుండేది.

Share.

About Author

Leave A Reply