15 నాటికి తీవ్ర వాయుగుండంగా గజ

0

ఆగ్నేయ బంగాళాఖాతంలో ఏర్పడిన తీవ్ర వాయుగుండం తుపానుగా బలపడింది. దీనికి ‘గజ తుపాను’గా ఐఎండీ నామకరణం చేసింది. ప్రస్తుతం ఇది పోర్ట్‌బ్లెయిర్‌కు 400 కి.మీ, చెన్నైకి 900కి.మీ, నెల్లూరుకి 1050కి.మీల దూరంలో కేంద్రీకృతమై ఉందని భారత వాతావరణ విభాగం తెలిపింది. ఇది తీవ్ర తుపానుగా మారి ఈ నెల 15 నాటికి చెన్నై-నెల్లూరు మధ్య తుపాను తీరం దాటే అవకాశం ఉందని ఐఎండీ అంచనా వేస్తోంది. గజ తుపాను ప్రస్తుతం పశ్చిమ వాయువ్య దిశగా గంటకు 11 నాట్ల వేగంతో కదులుతోందని స్పష్టం చేసింది. తుఫాను ప్రభావంతో రానున్న 24 గంటల్లో దక్షిణ కోస్తా, ఉత్తర తమిళనాడు తీరాల్లో ఓ మోస్తరు నుంచి భారీ వర్షాలు కురుస్తాయని వాతావరణ శాఖ వెల్లడించింది. ప్రస్తుతం తీర ప్రాంతాల్లో 45-55 కి.మీ.ల వేగంగా గాలులు వీస్తున్నాయని.. తుపాను తీరానికి దగ్గరగా వచ్చే సమయానికి వాటి తీవ్రత మరింత పెరుగుతుందని ఐఎండీ స్పష్టం చేసింది. గాలుల ప్రభావంతో సముద్రంలో అలల ఎత్తు పెరుగుతోందని హైదరాబాద్‌లోని ఇన్‌కాయిస్‌ వెల్లడించింది. సముద్రం అల్లకల్లోలంగా ఉన్న కారణంగా మత్స్యకారులెవరూ చేపల వేటకు వెళ్లొద్దని హెచ్చరికలు జారీచేసింది. ఇది పశ్చిమ ఆగ్నేయ దిశగా, అనంతరం 72 గంటల్లో ఉత్తర తమిళనాడు, దక్షిణ ఆంధ్రప్రదేశ్‌ వైపుగా ప్రయాణించే అవకాశం ఉందని అధికారులు తెలిపారు. దీని కారణంగా తమిళనాడు తీరం, దక్షిణ కోస్తాంధ్రలో పలుచోట్ల ఈ నెల 14 నుంచి భారీ వర్షాలు కురుస్తాయని వాతావరణశాఖ అంచనా వేస్తోంది. ప్రకాశం, నెల్లూరు జిల్లాల యంత్రాంగం అప్రమత్తంగా ఉండాలని విశాఖ తుపాను హెచ్చరికల కేంద్రం సూచించింది దీంతో అధికార యంత్రాంగం ఎప్పటికప్పుడు పరిస్థితిని గమనిస్తూ సహాయచర్యలపై దృష్టి సారించింది.

Share.

About Author

Leave A Reply