మహారాష్ట్ర, గోవాలోనూ… కేరళ లాంటి పరిస్థితులే

పశ్చిమ కనుమల్లో పర్యావరణ సమతౌల్యత ఇంకా ఎక్కువగా దెబ్బతింటే మహారాష్ట్ర, గోవాలోనూ కేరళ లాంటి పరిస్థితులే పునరావృతమవుతాయని పర్యావరణ వేత్తలు హెచ్చరిస్తున్నారు. పశ్చిమ కనుమల్లో పర్యావరణ సమస్యలపై 2011లో నిపుణుల బృందం ఓ నివేదికను సమర్పించింది. ఈ బృందంలో ఓ సభ్యుడిగా ఉన్న ప్రముఖ పర్యావరణవేత్త మాధవ్ గాడ్గిల్ మాట్లాడుతూ.. కేరళ, మహారాష్ట్ర, గోవాల్లో భిన్నమైన వర్షపాతం ఉన్నా, ఈ ప్రాంతాల్లో నిర్మాణ కార్యకలాపాలు వేగంగా జరగడంతో పర్యావరణ సమస్యల్లో మాత్రం ఎలాంటి తేడా ఉండబోదని స్పష్టం చేశారు. కేరళలో కురిసినట్టు అధిక వర్షపాతం నమోదుకాకున్నా, 2014లో పుణే జిల్లా మలిన్ మాదిరిగా ఆకస్మిక వరదలు, కొండచరియలు విరిగిపడటం లాంటివి తప్పవని గాడ్గిల్ హెచ్చరించారు. పర్యావరణ సమస్యలు ప్రతికూల ప్రభావం చూపుతాయని, ఆకస్మిక వరదలే కాకుండా ఇతర వైపరీత్యాలకు కారణమవుతాయని ఆయన అన్నారు. కాబట్టి నివేదికలో నిపుణులు చేసిన సిఫార్సులను తప్పనిసరిగా ప్రభుత్వాలు అమలుచేయాలని ఆయన కోరారు. అలాగే మహారాష్ట్రలోని రత్నగిరి, సింధ్‌దుర్గ్ జిల్లాల్లో పర్యావరణ సమస్యలపై స్థానికులతో గ్రామ సభలు నిర్వహించి చర్చించినట్టు తెలియజేశారు. కేరళ ప్రస్తుత పరిస్థితికి అక్రమ నిర్మాణాలు, భారీ ఎత్తున గనుల తవ్వకం లాంటి మానవ తప్పిదాలే కారణమని మాధవ్ గాడ్గిల్ వ్యాఖ్యానించారు. పశ్చిమ కనుమల పర్యావరణ స్థితిగతులపై నిపుణుల నివేదికను అమలుచేసి ఉంటే కేరళలో ప్రస్తుతం ఇలాంటి పరిస్థితి ఉత్పన్నమయ్యేది కాదని ఆయన పేర్కొన్నారు. పర్యావరణానికి ముప్పు వాటిళ్లని విధంగా ప్రజానుకూలమైన అభివృద్ధి జరగాలి తప్పా, రాజ్యాంగం హక్కుల పేరుతో దుర్వినియోగానికి పాల్పడరాదని మాధవ్ అన్నారు. అడవుల దుర్వినియోగం, నదీ తీరంలో భూముల ఆక్రమణ, అక్రమ మైనింగ్, నిర్మాణాల వల్ల కొండచరియలు విరిగిపడి నదీ ప్రవాహాలకు ఆటంకం కలిగించి వరదలు సంభవిస్తున్నాయని తెలిపారు. నిపుణుల తమ నివేదికలో ఈ వైపరీత్యాలపై హెచ్చరించి, భూమి, నీటి వనరుల వినియోగంపై ప్రజాధారిత విధానాన్ని నొక్కిచెప్పారని స్పష్టం చేశారు. ప్రజాస్వామ్య పరిణామంలో దేశానికి ఆదర్శంగా నిలిచే కేరళ, సహజ-వనరుల వినియోగం, నిర్వహణలో ప్రజాధారిత ప్రణాళికతో ముందుకు సాగాలని నివేదికలో పొందుపరిచారు. ఐరన్ ఓర్ మైనింగ్ కంపెనీలు సమర్పించిన వివరాల ఆధారంగా గోవాలో పర్యావరణ పరిస్థితులపై గాడ్గిల్ విస్తృత‌ అధ్యయనం చేశారు. ఉప్రదవాలు, విపత్తుల గురించి ప్రజలకు సరైన సమాచారం అందజేయడానికి ప్రభుత్వాలు నిరాకరిస్తున్నాయని కేంద్ర మాజీ సమాచార కమిషనర్ శైలేష్ గాంధీ వ్యాఖ్యానించారు. గాడ్గిల్ నివేదికను సమాచార హక్కు చట్టం ప్రజలకు అందుబాటులోకి తెచ్చిందని, సిఐసి ఉత్తర్వులో పేర్కొన్నట్టు అన్ని రాష్ట్రాలు వైపరీత్యాలను తగ్గించేందుకు అనుసరించాల్సిన అవసరం ఉందని ఆయన పేర్కొన్నారు.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com