ప్రేక్షకుడికి మంచి కామెడీ విందు

సినిమా అంటేనే వినోదం. ప్రేక్షకుడిని విసిగించకుండా రెండున్నర గంటలపాటు వినోదాన్ని పంచితే ఆ సినిమా హిట్టే. తరుణ్ భాస్కర్ ఇదే ఫార్ములాను ఫాలో అయ్యారు. ఓ నలుగురు స్నేహితుల చుట్టూ జరిగే సన్నివేశాలను కథగా మలిచి తెరకెక్కించేశారు. దానికి ‘ఈ నగరానికి ఏమైంది?’ అంటూ ఆసక్తికర టైటిల్ పెట్టేశారు. ‘పెళ్ళి చూపులు’ సినిమాతో ఈ యువ దర్శకుడు ప్రేక్షుకులతో పాటు విమర్శకుల మన్ననలు కూడా పొందారు. ఇప్పుడు యూత్‌ను టార్గెట్ చేస్తూ కొత్త సినిమాను తెరకెక్కించారు. ‘మీ గ్యాంగ్‌తో థియేటర్‌కు రండి చూస్కుందాం’ అని ఛాలెంజ్ కూడా చేశారు. ఇంతకీ తరుణ్ తన ఛాలెంజ్‌ను నిలబెట్టుకున్నారా..? చూద్దాం..

వివేక్ (విశ్వక్ సేన్), కార్తిక్ (సుశాంత్ రెడ్డి), కౌశిక్ (అభినవ్ గోమఠం), ఉపేంద్ర (వెంకటేష్ కాకుమాను) చిన్నప్పటి నుంచి మంచి స్నేహితులు. ఒక్కొక్కరిది ఒక్కో లక్ష్యం. వివేక్ డైరెక్టర్ అవ్వాలని ప్రయత్నిస్తుంటాడు. అయితే వివేక్ ప్రేమ విఫలమవుతుంది. దీంతో అతను డిప్రెషన్‌లోకి వెళ్లిపోతాడు. ఆ తరవాత ఈ నలుగురి స్నేహితుల మధ్య కొంత దూరం ఏర్పడుతుంది. అలాంటి సమయంలో కార్తిక్ పెళ్లి కుదురుతుంది. తన బాస్ కూతురిని పెళ్లిచేసుకుని అమెరికాలో లగ్జరీ లైఫ్ అనుభవించడానికి కార్తిక్ సిద్ధమవుతాడు. అతని దృష్టిలో ఇదొక బిజినెస్ డీల్. ప్రేమ గీమ పేరుతో సమయాన్ని వృథా చేయడం అతనికి అస్సలు ఇష్టంలేదు. పెళ్లికుదరడంతో కార్తిక్ స్నేహితులకు పార్టీ ఇస్తాడు. అందరూ బార్లో కలిసి మందు తాగుతారు. ఆ మత్తులోనే గోవా వరకు వెళ్లిపోతారు. అలా వెళ్లిన ఆ నలుగురి ప్రయాణం ఎలా సాగింది..? అక్కడికి వెళ్లాక వారు ఏం చేశారు..? జీవితంలో గురించి ఎలాంటి పాఠాలు నేర్చుకున్నారు..? అనేదే సినిమా.

ఎలా ఉందంటే..
మీరు ‘పెళ్ళి చూపులు’ సినిమా చూసినా, లేదంటే దాని గురించి విన్నా.. అది మనసులో పెట్టుకుని ఈ సినిమాకు వెళ్లకండి. ఎందుకంటే తరుణ్ భాస్కర్‌ నుంచి అస్సలు ఊహించని సినిమా ఇది. తన తొలి సినిమాతో అస్సలు పోల్చిచూడలేని విధంగా ‘ఈ నగరానికి ఏమైంది?’ని తెరకెక్కించారు తరుణ్. ఈ సినిమా గురించి ఏమైనా చెప్పుకోవాలి అంటే అది ముందుగా తరుణ్ గురించే. ఆయన రాసుకున్న స్క్రీన్‌ప్లే, సహజసిద్ధమైన డైలాగులు, సర్వసాధారణమై సన్నివేశాలు, కడుపుబ్బా నవ్వించే కామెడీ సినిమాకు ప్రధాన బలం. నలుగురు స్నేహితుల పాత్రలను అద్భుతంగా తీర్చిదిద్దారు. ముఖ్యంగా ప్రధాన పాత్ర వివేక్ మీకు చాలా కాలం గుర్తిండిపోతాడు. వివేక్ పాత్రలో భావోద్వేగాలను దర్శకుడు బాగా చూపించారు.

ఇక కౌశిక్ పాత్రలో కామెడీ బాగా పండింది. కడుపు చెక్కలయ్యేలా నవ్వించాడు. యానిమేటెడ్ సినిమాలను డబ్బింగ్ చేస్తూ హీరో అవ్వాలని కలలు కంటూ ఉంటాడు కౌశిక్. అలాగే తండ్రితో రోజూ తింట్లు తింటూ ఉంటాడు. కౌశిక్ కామెడీ పడిపడి నవ్విస్తుంది. వాస్తవానికి ఈ ఒక్క పాత్రే కాదు నలుగురు ఫ్రెండ్స్ కలిసి చేసే క్రేజీ పనులు తెగ నవ్విస్తాయి. ప్రతి సన్నివేశంలోనూ వినోదం పండేలా తరుణ్ భాస్కర్ స్క్రీన్‌ప్లే రాసుకున్నారు. సహజసిద్ధమైన డైలాగులు సినిమాకు మరో బలం. డైలాగులు వింటుంటే మనం రోజూ మాట్లాడుకునేవే కదా! అనిపిస్తుంది. కథ పెద్దగా ఏమీ లేకపోయినా సిచ్యువేషనల్ కామెడీతో కడుపు చెక్కలయ్యేలా నవ్వించారు తరుణ్ భాస్కర్. ముఖ్యంగా ఇంటర్వల్‌కు ముందు వచ్చే సీన్, సెకండాఫ్‌లో వచ్చే షార్ట్‌ ఫిల్మ్ సన్నివేశంలో కామెడీ మిమ్మల్ని సీటులో కూర్చోనివ్వదు. కామెడీతో పాటు ఎమోషన్స్‌ను కూడా దర్శకుడు బాగానే క్యారీ చేశారు.

కామెడీ పరంగా ఎలాంటి లోటు లేకుండా ఈ సినిమాలోనూ కాస్త నెమ్మదిగా నడిచే సన్నివేశాలు లేకపోలేదు. ప్రధాన పాత్ర వివేక్ లవ్ స్టోరీ ప్రేక్షకుడికి కాస్త విసుగు పుట్టిస్తుంది. వివేక్ ప్రేమలో పడటం, విడిపోవడం వంటి అంశాలను సాదాసీదాగా చూపించారు దర్శకుడు. ప్రథమార్ధం కూడ కొంత సాగదీశారనిపిస్తుంది. కానీ కామెడీని ఎంజాయ్ చేసే ప్రేక్షకులకు ఆ ఫీలింగ్ కలగదు. కామెడీ ప్రధానంగా పూర్తిగా యువతను దృష్టిలో పెట్టుకుని రూపొందించిన ఇలాంటి సినిమాలో కథ , ఎమోషన్స్, యాక్షన్‌ను వెతకడంలో అర్థంలేదు. అలాంటి వారికి ఈ సినిమా పెద్దగా రుచించకపోవచ్చు. ఇవి తప్ప సినిమాలో చెప్పుకోవడానికి పెద్దగా మైనస్ పాయింట్లు ఏమీలేవు. సినిమా అంతా కామెడీ.. కామెడీ.. కామెడీ.

ఎవరెలా చేశారంటే..
సినిమాలో నాలుగు పాత్రలే కీలకం. ఒక్కో సన్నివేశంలో ఒక్కో పాత్ర హీరో. వివేక్ పాత్రలో విశ్వక్ సేన్ నటన, స్క్రీన్ ప్రెజెన్స్ అద్భుతం. ఆయన నటన ప్రేక్షకులకు కచ్చితంగా నచ్చుతుంది. కౌశిక్ పాత్రలో అభినవ్ గోమఠం కామెడీ టైమింగ్ సూపర్. తన హావభావాలు, హాస్యంతో కడుపుబ్బా నవ్వించాడు. కార్తిక్ పాత్రలో సుశాంత్, ఉపేంద్ర పాత్రలో వెంకటేష్ ఒదిగిపోయారు. ప్రతి గ్యాంగ్‌లోనూ ఒక రఫ్ క్యారెక్టర్ తప్పనిసరి. అలాంటి పాత్రే ఉపేంద్ర. ఈ క్యారెక్టర్‌లో వెంకటేష్ నటన సహజసిద్ధంగా ఉంది. ఇక హీరోయిన్లు అనీషా ఆంబ్రోస్, సిమ్రన్ చౌదరి పాత్రలకు పెద్దగా ప్రాధాన్యం ఏమీలేదు. తమ పరిధి మేర వాళ్లు బాగానే నటించారు.

సాంకేతిక విభాగం..
తక్కువ బడ్జెట్‌లో తీసిన సినిమా అయినా క్వాలిటీలో మాత్రం ఎక్కడా రాజీ పడలేదు. చాలా అందంగా తెరకెక్కించారు. దర్శకుడిగా తరుణ్ భాస్కర్ పూర్తిగా సక్సెస్ అయ్యారు. ఆయన రాసుకున్న ప్రతి సన్నివేశాన్ని సినిమాటోగ్రాఫర్ నికేత్ బొమ్మి చాలా అందంగా తన కెమెరాలో బంధించారు. ఆయన సినిమాటోగ్రఫీ సినిమాకు మరో ప్రధాన బలం. వివేక్ సాగర్ అందించిన పాటలు బాగున్నాయి. నేపథ్య సంగీతం కూడా సన్నివేశాలకు తగినట్లుగా ఉంది. రవితేజ గిరిజాల సినిమాను చాలా క్రిస్పీగా ఎడిటింగ్ చేశారు. సినిమా నిర్మాణ విలువలు బాగున్నాయి. తక్కువ బడ్జెట్‌లో నిర్మాత సురేష్ బాబు మనసును హత్తుకునే సినిమాను నిర్మించారు.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com