సిటీలో మళ్లీ డ్రగ్స్ కలకలం

హైదరాబాద్‌లో మళ్లీ డ్రగ్స్ కలకలంరేగింది. నగరంలో డ్రగ్స్ సరఫరా చేస్తున్న అబ్దుల్ అనే వ్యక్తిని పోలీసులు పట్టుకున్నారు. అతడి నుంచి 30 గ్రాముల కొకైన్‌తో పాటూ రూ.7లక్షల డబ్బును స్వాధీనం చేసుకున్నారు. కొంతకాలంగా అబ్దుల్ నగరంలో డ్రగ్స్ సరఫరా చేస్తున్నట్లు పోలీసులకు సమాచారం అందగా.. అతడిపై నిఘా పెంచి రెడ్ హ్యాండెడ్‌గా పట్టుకున్నారు. నాలుగేళ్లగా నగరంలోని బంజారాహిల్స్, జూబ్లీహిల్స్, గచ్చిబౌలి ప్రాంతాల్లో ఈ డ్రగ్స్ దందా చేస్తున్నట్లు విచారణలో తేలిందట. హైదరాబాద్‌లో ప్రైవేట్ ట్రావెల్స్ నడుపుతున్న అబ్దుల్.. గోవాకు చెందిన మాక్స్ అనే వ్యక్తితో పరిచయం పెంచుకున్నాడు. అతడి నుంచి డ్రగ్స్ కొనుగోలు చేసి.. నగరంలో బడా బాబుల పిల్లలకు విక్రయిస్తున్నాడు. అబ్దు‌ల్‌కు ట్రావెల్స్ ఉండటంతో.. గోవా నుంచి వచ్చే బస్సుల్లో గుట్టుచప్పుడు ఈ డ్రగ్స్‌ను తీసుకొచ్చేవాడని పోలీసులు అనుమానిస్తున్నారు. అబ్దుల్‌పై కేసు నమోదు చేసిన పోలీసులు.. మాక్స్ గురించి ఆరా తీస్తున్నారు. డ్రగ్స్ వ్యవహారంలో ఇంకా ఎవరెవరు ఉన్నారనే కోణంలో దర్యాప్తు చేస్తున్నారు. గతేడాది హైదరాబాద్‌లో డ్రగ్స్ మాఫియా ఆటకట్టించారు పోలీసులు. అలాగే సినీ ఇండస్ట్రీలో కొందరికి డ్రగ్స్ ముఠాలతో సంబంధాలు బయటపడటం.. వారిని సిట్ ప్రశ్నించడం సంచలనంగా మారింది. అప్పటి నుంచి నగరంలో డ్రగ్స్‌ ముఠాలపై పోలీసులు ఉక్కుపాదం మోపారు. మళ్లీ చాలా రోజుల తర్వాత ఇప్పుడు నగరంలో డ్రగ్స్ పట్టుబడటం కలకలంరేపుతోంది.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com