జెట్ ఉద్యోగుల కోతపై వెనక్కి తగ్గిన మేనేజ్ మెంట్

దేశీయ ఎయిర్‌లైన్స్‌ దిగ్గజం జెట్‌ ఎయిర్‌వేస్‌లో ప్రతిపాదిత జీతాల కోత, ఉద్యోగుల తొలగింపులపై దుమారం చెలరేగుతోంది. జీతాల తగ్గింపు విషయంలో కంపెనీ యాజమాన్యం, పైలట్ల మధ్య విభేదాలు తీవ్రమవుతున్నాయి. వ్యయాలను తగ్గించుకోకపోతే రెండు నెలలకు మించి నడిపే పరిస్థితి లేదంటూ జెట్‌ యాజమాన్యం తమను బెదిరిస్తోందని పైలట్లు పేర్కొన్నట్లు మీడియాలో వార్తలు వచ్చాయి. అయితే, జెట్‌ ఎయిర్‌వేస్‌ దీనిపై శుక్రవారం ఎక్స్చేంజీలకు వివరణ ఇచ్చింది. 60 రోజులకు మించి నడిచే పరిస్థితి లేదంటూ వచ్చిన వార్తల్లో ఎలాంటి నిజం లేదని, ఇదంతా కుట్రపూరితంగా చేస్తున్నారంటూ స్పష్టం చేసింది. అదేవిధంగా సంస్థలో వాటా విక్రయ ప్రతిపాదనలేవీ లేవని కూడా తేల్చిచెల్పింది. అయితే, వ్యయాలను తగ్గించుకోవడం కోసం పలు చర్యలను అమలు చేస్తున్నామని చెప్పడం కొసమెరుపు!! జీతాల కోత‌, వాటాల విక్ర‌యం వార్త‌ల‌ను జెట్ ఎయిర్‌వేస్ ఛీప్ ఎగ్జిక్యూటివ్ ఆఫీస‌ర్ విన‌య్ దుబే ఖండించారు. జెట్ ఎయిర్‌వేస్ ఆర్థిక ఇబ్బందుల‌తో స‌త‌మ‌త‌మ‌వుతోంద‌ని సిబ్బందిని జీతాల్లో కోత విధించాల‌ని కోరింద‌ని వ‌చ్చిన వార్త‌లు వ‌దంతులేన‌ని ఆయ‌న కొట్టిపారేశారు. సంస్థ గురించి మీడియాలో వ‌స్తున్న వార్త‌ల్లో వాస్త‌వం లేద‌ని దుబే అన్నారు. సంస్థ ఆర్థికంగా బలోపేతం చేసే ప్రయత్నాల్లో భాగంగానే వ్యయాల తగ్గింపు వంటి నిర్ణయాలు తీసుకుంటున్నామని అన్నారు. జూన్ ముగింపు నాటి త్రైమాసిక ఫలితాల్లోనూ విమానయాన రంగం ఫలితాలు అంత ఆశాజనకంగా లేవు. ప్ర‌భుత్వ రంగ సంస్థ ఎయిర్ ఇండియా.. ఇప్ప‌టికే అప్పుల‌తో కునారిల్లుతూ రోజువారీ నిర్వ‌హ‌ణే క‌ష్టంగా మారే ప‌రిస్థితి తెచ్చుకుంది. మ‌రో వైపు క్యూ1లో ప్రైవేటు విమాన సంస్థ ఇండిగో నికర లాభం 97 శాతం క్షీణించి రూ.27 కోట్లు మాత్రమే నమోదు చేసింది. ప్రతి త్రైమాసికంలోనూ మంచి లాభాలను నమోదు చేస్తున్న సంస్థ ఈసారి చతికిలబడింది. విదేశీ మారకం, అధిక ఇంధన ధరలు సంస్థ లాభాలను దెబ్బ తీశాయి.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com