కూలిన చార్టెడ్ విమానం.. ఐదుగురు దుర్మరణం

ఓ చార్టెడ్ విమానం ఇళ్ల మధ్య కూలిపోయింది. నిర్మాణంలో ఇంటికి పక్కనే ఉన్న ఖాళీ ప్రదేశంలో విమానం కుప్పకూలింది. విమానం నేలను ఢీకొనగానే భారీగా మంటలు చెలరేగాయి. ముంబై శివారులోని ఘట్కోపార్ వద్ద గురువారం మధ్యాహ్నం 1.30 గంటల ప్రాంతంలో ఈ ప్రమాదం జరిగింది. ఈ ఘటనలో ఐదుగురు దుర్మరణం చెందారు. ప్రమాద సమయంలో విమానంలో ఫైలట్ సహా నలుగురు వ్యక్తులు ఉన్నారని, వారితో పాటు ప్రమాదం జరిగిన ప్రదేశంలో ఉన్న మరో వ్యక్తి మృతిచెందారని బృహన్ ముంబై మున్సిపల్ కార్పోరేషన్ విపత్తు నియంత్రణ విభాగం వెల్లడించింది.

ముంబై విమానాశ్రయం ప్రధాన రన్‌వే 27 నుంచి టేకాఫ్ తీసకున్న కొంత సేపటికే విమానం కూలిపోయింది. ప్రమాదం జరిగిన ప్రదేశం విమానశ్రయం నుంచి మూడు కిలోమీటర్ల లోపలే ఉంటుందని అధికారులు తెలిపారు. ప్రమాదం జరిగిన వెంటనే విమాన శకలాల నుంచి భారీగా మంటలు ఎగసిపడ్డాయి. అగ్నిమాపక సిబ్బంది మూడు ఫైరింజన్లు, ఒక జంబో వాటర్ ట్యాంకర్‌తో ప్రమాద స్థలానికి చేరుకుని మంటలను అదుపుచేశారు. పది నిమిషాల్లోని మంటలను అదుపులోకి తెచ్చారు.

అది 12 మంది ప్రయాణించగలిగే ఎయిర్‌క్రాఫ్ట్ (వీటీ-యూపీజెడ్) అని, విమానంలో పైలట్‌తో పాటు ముగ్గురు ప్రయాణికులు ఉన్నారని వారంతా మరణించారని అగ్నిమాపక శాఖ అధికారులు తెలిపారు. రెండు ఛిద్రమైన మృతదేహాలను స్వాధీనం చేసుకున్నామన్నారు. కాగా, ప్రమాదానికి గురైన ఎయిర్ కింగ్ సి90 విమానం ముంబైకు చెందిన యూవై ఏవియేషన్ ప్రైవేట్ లిమిటెడ్ కంపెనీకి చెందినది తెలిసింది. గుట్కా వ్యాపారి దీపక్ కొఠారి ఈ కంపెనీని నడుపుతున్నారు. ఇది చాలా పాత విమానమని, గతంలో ఉత్తరప్రదేశ్ ప్రభుత్వం ఉపయోగించినట్లు సమాచారం.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com