లక్కీ డీప్ స్కాంలో టీటీడీ కాల్ సెంటర్ ఉద్యోగి

లక్కీ డిప్ ద్వారా భక్తులకు కేటాయించే శ్రీవారి సేవా టిక్కెట్లను దారి మళ్లించిన టీటీడీ కాల్ సెంటర్ ఉద్యోగి శ్రీనివాసులను విజిలెన్స్ అధికారులు అదుపులోకి తీసుకున్నారు. శ్రీవారి సేవా టికెట్ల కుంభకోణంలో కీలకంగా వ్యవహరించిన శ్రీనివాసులు లక్కీడీప్‌లో అక్రమంగా దాదాపు 1,000 సుప్రభాత సేవ టికెట్లు పొందినట్టు అధికారులు గుర్తించారు. ఒక్కో టిక్కెట్‌ను రూ.2,500 నుంచి రూ.4 వేలకు అమ్ముకున్నట్టు దర్యాప్తులో తేలింది. అంతేకాదు, ఈ వారంలోనూ మరో 16 సేవా టికెట్లను దక్కించుకున్నట్లు తేలింది. వాస్తవానికి శ్రీవారి ఆర్జిత సేవా టిక్కెట్లు ఆన్ లైన్ లాటరీ ద్వారా పారదర్శకంగా అందుతాయి. కానీ కొందరు మాయగాళ్లు నకిలీ ఆధార్‌లతో ఆర్జిత సేవా టిక్కెట్లు పొంది సొమ్ము చేసుకుంటున్నారు. స్వామి వారి సుప్రభాతం సేవకు ఒకరి స్థానంలో మరొకరు హాజరవుతుండటంతో టీటీడీ విజిలెన్స్ అధికారులు అనుమానించి ఆరా తీయడంతో అసలు విషయం వెలుగు చూసింది.టీటీడీలో సేవా టికెట్ల కుంభకోణంపై గత మూడు నెలల నుంచి విజిలెన్స్ అధికారులు దర్యాప్తు చేస్తోన్న విషయం తెలిసిందే. ఈ కేసులో వారం రోజుల కిందట షోలాపూర్‌కు చెందిన ప్రభాకర్ అనే దళారిని అదుపులోకి తీసుకుని విచారించినప్పుడు విస్తుపోయే వాస్తవాలు వెలుగుచూశాడు. ఆధార్ కార్డులను ఫోర్జరీ చేసి 1,200 సేవా టికెట్లను దక్కించుకున్నట్టు తెలిసి విజిలెన్స్ అధికారులే అవాక్కయ్యారు. ప్రభాకర్ నుంచి సేకరించిన సమాచారంతో చెన్నై, గుంటూరు కేంద్రంగా ఇదే తరహా అక్రమాలు జరుగుతున్నట్లు గుర్తించారు. తాజాగా నకిలీ ఓటర్ కార్డుల ద్వారా లక్కీడీప్‌లో శ్రీనివాసులు వెయ్యికిపైగా సుప్రభాత సేవ టికెట్లను అక్రమంగా పొందినట్లు విచారణలో తేలింది. గత నాలుగేళ్లుగా శ్రీనివాసులు ఇలా నకిలీ ఓటర్ కార్డులతో శ్రీవారి సేవా టికెట్లను తీసుకుంటున్నట్లు అధికారులు వెల్లడించారు.సాధారణంగా శ్రీవారి ఆర్జిత సేవా టిక్కెట్లను మూడు నెలల ముందే ఆన్‌లైన్‌లో విడుదల చేస్తారు. ప్రతి నెల మొదటి శుక్రవారం సుప్రభాత సేవ, ఆర్జితసేవ, అర్చన, కళ్యాణోత్సవం, వసంతోత్సవం, దీపాలంకరణ వంటి సేవలకు సంబంధించి టిక్కెట్లు ఆన్‌లైన్‌లో లక్కీ డిప్ ద్వారా భక్తులకు కేటాయిస్తారు. ఈ టిక్కెట్ల కోసం భక్తులు నాలుగు రోజుల ముందు ఆన్‌లైన్‌లో రిజిస్ట్రేషన్ చేసుకోవాల్సి ఉంటుంది. తర్వాత లక్కీడిప్ ద్వారా వీటిని అందజేస్తారు.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com