బ్లేడ్ రన్నర్ సజేష్ కృష్ణన్

0

కాళ్లు లేవని వారు కలతచెందలేదు. కృత్రిమ పాదాలను అమర్చుకుని ఆత్మవిశ్వాసంతో పరుగుపెట్టారు. బ్లేడ్ రన్నర్లుగా పేరు గడించారు. భారత్‌లో ఇప్పటికే చాలా మంది బ్లేడ్ రన్నర్లు ఉన్నారు. మేజర్ డి.పి.సింగ్, కిరణ్ కనోజియా భారత్ తరఫున అంతర్జాతీయ స్థాయిలో తొలి బ్లేడ్ రన్నర్లుగా గుర్తింపు తెచ్చుకున్నారు. ఆ స్థాయిలో కాకపోయినా స్థానిక మారథాన్లలో పాల్గొనే బ్లేడ్ రన్నర్లు చాలా మందే ఉన్నారు. అయితే కేరళ రాష్ట్రం నుంచి ఇప్పటి వరకు బ్లేడ్ రన్నర్లు లేరు. తొలిసారి ఒక బ్లేడ్ రన్నర్ వెలుగులోకి వచ్చాడు. ఆయనే సజేష్ కృష్ణన్. రోడ్డు ప్రమాదంలో ఎడమ కాలును కోల్పోయిన సజేష్.. మేజర్ డి.పి.సింగ్ స్ఫూర్తితో బ్లేడ్ రన్నర్‌గా మారాడు. కేరళ తొలి బ్లేడ్ రన్నర్‌గా అవతరించాడు.

కేరళలోని పయ్యన్నూర్ (కన్నూర్)కు చెందిన సజేష్.. తనకు 18 ఏళ్ల వయస్సు ఉన్నప్పుడు రోడ్డు ప్రమాదానికి గురయ్యాడు. డాక్టర్లు ఎడమ కాలు తీసేయాలని సూచించారు. అప్పుడు సజేష్ ఇంజినీరింగ్ చదువుతున్నాడు. ‘కాలు తీసేస్తే నాకు నేనుగా నడవలేను, ఇక జీవితాంతం ఊత కర్రతో నడవాల్సిందేనా’ అని సజేష్ తీవ్ర ఆవేదనకు గురయ్యాడు. అయితే డాక్టర్లు ఆయనకి ధైర్యం చెప్పారు. మోకాలు కింది వరకు కాలు తీసేస్తే కృత్రిమ కాలు అమర్చుకుని సులభంగా నడవొచ్చని తెలిపారు. దీంతో సజేష్‌‌కు ధైర్యం వచ్చింది. కృత్రిమ కాలును అమర్చుకోవడానికి సజేష్ అంగీకరించాడు.

అయితే ప్రముఖ బ్లేడ్ రన్నర్ మేజర్ డి.పి.సింగ్ నిర్వహించే ‘ది ఛాలెంజింగ్ వన్స్’ ఫేస్‌బుక్ గ్రూప్ సజేష్‌ను పూర్తిగా మార్చేసింది. ఈ గ్రూప్‌లో చేరిన సజేష్.. తనలా ఎంతో మంది అంగవైకల్యంతో బాధపడుతున్నారని గ్రహించాడు. గ్రూప్‌లో వారు పంచుకునే అనుభవాలు సజేష్ ఆలోచనలను మార్చాయి. ఎంతో మంది బ్లేడ్ రన్నర్ల వీడియోలు ఆ గ్రూపులో చూసిన సజేష్.. తను కూడా అలా మారాలనుకున్నాడు. ప్రయత్నాలు మొదలుపెట్టాడు. 2017లో ‘వాస్క్యులర్ సొసైటీ ఆఫ్ ఇండియా’ నిర్వహించిన మారథాన్‌‌కు సజేష్‌కు ఆహ్వానం అందింది. రూ.6 లక్షల విలువ చేసే రన్నింగ్ బ్లేడ్‌ను వారు సజేష్‌కు బహుమతిగా ఇచ్చారు.

సజేష్ తొలిసారి కొచిలో నిర్వహించిన ‘స్పైస్ కోస్ట్ మారథాన్’లో పాల్గొన్నాడు. కృత్రిమ కాలుతో 48 నిమిషాల్లో 5 కిలోమీటర్లు పరిగెత్తాడు. ఇక అప్పటి నుంచి సజేష్ వెనక్కి తిరిగి చూడలేదు. తన బ్లేడ్ రన్‌తో రాష్ట్రస్థాయిలో ఎన్నో రికార్డులు నెలకొల్పాడు. ఇంజినీరింగ్ గ్రాడ్యుయేట్ అయిన సజేష్ ప్రస్తుతం ప్రభుత్వ ఐటీఐ కళాశాలలో గెస్ట్ ఫ్యాకల్టీగా పనిచేస్తున్నాడు. ఓ వైపు ఉద్యోగం చేస్తూనే తనకిష్టమైన బ్లేడ్ రన్నింగ్‌లో దూసుకెళ్తున్నాడు. సజేష్‌కు క్రీడలంటే చాలా ఇష్టం. ముఖ్యంగా బ్యాడ్మింటన్ అంటే పిచ్చి. పారా బ్యాడ్మింటన్‌లో రాణించాలని చూస్తున్నాడు.

ఇదిలా ఉంటే, త్వరలో నిర్వహించనున్న ఆసియా యాంపుటీ ఫుట్‌బాల్ ఛాంపియన్‌షిప్‌కు పారా యాంపుటీ ఫుట్‌బాల్ అసోసియేషన్ ఆఫ్ ఇండియా ఎంపిక చేసిన భారత జట్టులో సజేష్ స్థానం పొందాడు. ఈ ఫుట్‌బాల్ ఛాంపియన్‌షిప్ డిసెంబర్ 1 నుంచి 5వ తేదీ వరకు ఇండోనేషియాలోని జకర్తాలో నిర్వహించనున్నారు. ఈ ఫుట్‌బాల్ ఛాంపియన్‌షిప్‌లో రాణించి సజేష్ తన జీవితంలో మరింత ఉన్నత స్థాయికి చేరుకోవాలని ఆశిద్దాం.

Share.

About Author

Leave A Reply