105 చోరీ కేసుల్లో నిందితుడు

రోడ్డుపై ఒంటరిగా మహిళలు కనిపించడం ఆలస్యం.. ఒకడు బైక్‌పై రయ్యమంటూ వస్తాడు. నిమిషాల్లోనే మెడలో చైన్ లాగేసుకొని మాయమైపోతాడు. ఒకటి కాదు రెండు వందల్లో స్నాచింగ్‌ కేసులు ఉన్నాయి. ఏడాదిగా పోలీసులు వేటాడుతున్నా దొరక్కుండా తిరుగుతున్న పెద్ద కేటుగాడు. స్నాచింగ్‌ బాధితుల సంఖ్య పెరగడంతో పోలీసులు తలలు పట్టుకున్నారు. ఇక లాభం లేదనుకొని నిఘా పెట్టారు.. వాళ్లు టార్గెట్ చేస్తే దొరక్కుండా పోతాడా.. మొత్తానికి దొరికేశాడు. అతడ్ని పట్టుకొని కూపీలాగితే స్నాచింగ్ బ్యాక్‌గ్రౌండ్ మొత్తం బయటపడగా.. ఆ చిట్టా మొత్తం బయటకు తీసి చూసిన పోలీసులకే దిమ్మ తిరిగిందట. పోలీసులకు చిక్కిన ఆ కేటుగాడి పేరు అచ్యుత్ కుమార్ అలియాస్ గణి. కర్ణాటకలోని దార్వాడ్‌కు సమీపంలోని కొలివాడ సొంత ఊరు. ఊళ్లో పెద్ద రియల్టర్‌గా బిల్డప్ ఇస్తూ తిరుగుతుండేవాడు. స్నాచింగ్‌లు చేస్తూ బాగానే వేనకేశాడు. స్నాచింగ్ కేసులు పెరిగిపోవడంతో గణిపై పోలీసులు నిఘా పెంచారు. జూన్ 17న పోలీసుల స్పెషల్ టీమ్ అతడ్ని పట్టుకొని 3.5కేజీల బంగారాన్ని రికవర్ చేయగా.. మార్కెట్‌లో దీని విలువ రూ.కోటి రూపాయలని పోలీసులు అంచనా వేశారు. గణి అరెస్ట్‌తో స్టోరీ ఆగిపోలేదు. స్నాచింగ్ కేసుల చిట్టాను మొత్తం ముందు పెట్టుకొని వెతికితే.. బెంగళూరులోనే 77కుపైగా కేసులు ఉన్నాయి. అతడిపై 18 వారెంట్లు కూడా ఉన్నట్లు తేలింది. బెంగళూరు మాత్రమే కాదు తుముకూరు, హసన్, రామనగర, బళ్లారి, దార్వాడ్‌లో కూడా స్నాచింగ్‌లు చేసినట్లు గుర్తించారు. పెండింగ్‌లో ఉన్న మొత్తం 105 కేసులు పరిష్కారం అయ్యాయట. అంతేకాదు గణి దగ్గర నుంచి 5 బైక్‌లు కూడా స్వాధీనం చేసుకున్నారు. స్నాచింగ్‌కు వెళ్లే ప్రతిసారీ బైక్‌ను మార్చేవాడు. వాటి నెంబర్ ప్లేట్లను కూడా మారుస్తూ పోలీసులకు దొరక్కుండా తప్పించుకునేవాడని తేలింది. మొత్తానికి ఈ కేటుగాడి అరెస్ట్‌తో ఎన్నో రోజులుగా పెండింగ్‌లు ఉన్న కేసులకు పరిష్కారం దొరకడంతో పోలీసులు కూడా కాస్త ఊపిరి పీల్చుకున్నట్లయ్యింది.

Leave a Reply

Your email address will not be published. Required fields are marked *

WP Facebook Auto Publish Powered By : XYZScripts.com